Assam-ah Covid-19 vangin mi pakhat thih belh

Assam-a Covid-19 kai zinga pakhat chu Ningani khan a thi a, an state-ah he hri vanga thi hi mi pakua an tling tawh a ni. 

Hri kai hi mi 4,904 an awm tawh a, an zinga a tam zawk chu enkawl dam niin enkawl mek mi 2,044 an awm. 

Ningania Covid-19 vanga thi hi Diphu Medical College and Hospital-a enkawl lai a ni a, Karbi Anglong district-a hri vanga thi an awm pahnihna a ni. Assam-a hri kai thihpui mi pakua zinga pali chu kar liam ta chhunga thi an ni. An zinga pakhat chu Bongaigaon qurantine centre aṭanga tlanchhuah tum, a lua hliam na tak a tawrh vanga thi a ni. 

State sorkarin Guwahati khawpuia chengte test runpui neih chu a ni thumna atan nimin khan neih chhunzawm a ni. He hmalakna, Assam Targeted Surveillance Program (ATSP) hnuaiah hian kar khat chhungin mi 50,000 chuang test hman tum a ni. He program hi Guwahati bakah state chhunga district 33-ah pawh kalpui a ni dawn bawk. 

Health department chuan an state-a hri darh zel tur venna atan test pawh tam zawk neih chhoh zel a tum. Ningani thleng khan sample 2,46,590 an test tawh a, test tam zawk neih chhoh zel an tum bawk a ni.