Manipur CM-in a cabinet tilian, minister 6 lakluh belh

Manipur chief minister N Biren Singh chuan a cabinet tilianin, Inrinni liam ta khan BJP kaihhruai sorkar thara minister turin mi paruk rinawmna thu tiamtira lakluh belh a ni.

Cabinet minister atana lakluh belhte hi BJP MLA - Letpao Haokip, Sapam Ranjan Singh, Thounaojam Basanta Singh, L Susindro Meitei leh H Dingo Singh bakah Naga People's Front (NPF) MLA Khasim Vashum-te an ni.

Governor La Ganesan chuan Imphal-a Raj Bhavan-ah minister tharte hi rinawmna thu a tiamtir a ni. Minister-te hian an chanpual tur erawh siam a la ni lo.

Minister paruk lakluh tharte nen, CM Singh kaihhruai sorkar tharah hian minister 12 an awm ta, an zinga 10 chu BJP MLA niin, NPF MLA pahnih an awm bawk. March 21 khan CM Singh leh minister pangate chu lakluh an lo ni tawh a ni.

Manipur assembly inthlan neihah khan BJP hian seat 60 awmna assembly-ah seat 32 lain, a thawhpui NPF hian seat nga a la a ni. BJP kaihhruai sorkar hi National People’s Party (NPP), JD(U), Kuki People’s Alliance (KPA) leh Independent MLA-ten an thlawp bawk a ni. MLA panga nei, Congress party chu House-ah eptu party awmchhun a ni.