TMC hruaitu Abhishek Banerjee-a'n Meghalaya tlawh dawn

Trinamool Congress (TMC) national general secretary, Abhishek Banerjee chuan nakkuma assembly inthlan neihna, Meghalaya state chu May thla hian a tlawh dawn tih an party thupuangtu Kunal Ghosh chuan a sawi.

Kunal Ghosh chuan May 3-ah Banerjee hian Meghalaya hi tlawhin, state chhunga an party hruaitute meeting a neihpui dawn a, inthlan lo awm tur atana inbuatsaih dan turte a sawipui dawn tih a tarlang.

Nikum November thla khan Congress MLA 17 zinga 12 chuan TMC hi an zawm a, tunah hian Meghalaya Assembly-a eptu party lian ber a ni mek a ni. TMC zawmtu zingah hian chief minister hlui Mukul Sangma pawh a tel.

Kum 2021-a West Bengal assembly inthlana TMC-in chiang taka hnehna an chan hnuah, Bengal chief minister Mamata Banerjee chuan central-a BJP sorkar paihthlak a nih theihna turin eptu party hrang hrangte chu inlungrual turin a sawm a, TMC pawhin Goa, Haryana, Tripura leh Meghalaya-ahte huang zauhin hma a la mek a ni.