Greater Tripaland phutna engmahin tidanglam dawn lo : Pradyot Debbarma

Tripura Indigenous Progressive Regional Alliance (TIPRA) hotu, Pradyot Kishore Debbarma chuan Greater Tripaland an phutna chu eng thil mahin a tidanglam dawn lo tih a sawi.

Debbarma chuan TIPRA-in Greater Tipraland a phutna chu an titawp dawn tia Tiprasa hnamte rilru tihbuai tuma hma la an awm tih a sawi a, mahse an thil phut chungchangah hian an dinna chu a la ngai reng a ni, a ti.

Tun hnaia media report ṭhenkhatah sorkar laipuiin kum khat chhunga Tiprasa mi 20,000-te sorkar hna a pek chuan TIPRA hian Greater Tipraland an phutna chu an titawp dawn tiin an tarlang a, he report hi social media lamah pawh an thehdarh nasa hle. Hemi chungchang hi chhangin, "Tiprasa mi 20,000 te sorkar hna an pek chuan Greater Tipraland kan phutna kan titawp ang tih thu engmah ka sawi lo. Sorkar laipuiin chhawmdawlna tur, Rs vaibelchhe 2,000 emaw Rs vbc 20,000 emaw pawh min pe a nih chuan contractor, politician leh Members of District Council (MDCs) kutah a lut vek dawn a, hei ai chuan Tripasa mi 20,000 te sorkar hna pe zawk rawh se, tiin ka sawi a ni," tiin a sawi.

Mi 20,000 te sorkar hna pek a nih chuan an khawsak dinhmun pawh a siamṭha dawn a, hemi rual hian Greater Tipraland an phutna erawh kalpui zel an tum tih a tarlang.

TIPRA hian Tripura Tribal Areas Autonomous District Council (TTAADC) leh a chhehvel bial chu Tripura leilung fate tan state hrana siam an phut a ni. Debbarma chuan an thil phut chungchang chu ziakin an thlawp ngei a ni tih an pe a nih loh chuan, BJP leh party dang pawh thawhpui an tum lo tih a sawi nghal bawk.