AP: Sorkar in PRC pek chungchang enfiah dawn

Arunachal Pradesh sorkar chuan Ningani khan thuchhuah siamin tribal chhungkua ni lo Permanent Resident Certificate (PRC) pek tura rawtna awm te chu an ennawn leh hnuah chuah PRC hi an pe dawn tih an sawi.

Arunachal-ah hian Namsai leh Changlang district chhungah chhung­kaw 300-400 inkar vel tribal ni lo an cheng a, heng mi te hi hunrei tak cheng tawhin PRC an ngiat a ni. Hetiang hi ni mah se kar hmasa khan tribal mite chuan Joint High Power Committee (JHPC) hnen aṭanga report an dawn hnuah chauh tribal mi ni lo te hnenah hi chuan PRC pek nise an duh thu an sawi ve thung.

Sorkar thupuangtu Bamang Felix chuan Ningani khan JHPC report an dawn hnuah chauh sorkar chuan thutlukna an siam dawn tih a sawi a, JHPC in thurawn an pek anga hma an lak dawn thu sawiin PRC chu an pechhuak a nih pawhin ram leilung fate dikna palzut zawnga pe tur an nih loh thu a sawi.

JHPC hi Arunachal sorkar din a ni a, Environment and Forest Minister Nabam Rebia chu hotuah dahin consultative meeting stakeholder zawng zawng te nen state chhung hmun hrang hrang­ah an nei tawh a ni.

Felix chuan ram leilung fate duh loh dan chuan hma an la dawn lo tih sawiin heihi Chief Minister Pema Khandu leh Deputy Chief Minister Chowna Mein-te ngaihdan pawh a ni, a ti.

Report an dawn hunah cabinet chuan an sawiho leh phawt dawn tih a sawi bawk.

Pema Khandu leh Chow­na Mein te hian tunhnai khan tribal mi ni lo te hnen­ah hian PRC hi an pek dawn thu an lo sawi tawh a, hei hian sawisel a hlawh hle a, hemi a nih avang hian sorkar hian Ningani khan thuchhuah hi an siam leh ta a ni.