Assam Panchayat inthlanah BJP in hnehna chang chiang PM Modi-an lawmthu sawi

Sorkar laipuia sorkarna chang mek Bharatiya Janata Party (BJP) chu tunhnai state panga inthlan result puanah che ṭha lo hle mah se Assam Panchayat inthlanah erawh an che ṭha hle a, Panchayat seat hrang hrangah hnehna an chang chiang hle.

Thulakna in a tarlan dan chuan BJP hian Zilla Parishad Council seat 211-ah hnehna an chang a, a hnaih ber tu Congress chuan seat 116 la in AIUDF leh AGP ten an dawt a ni.

BJP hian Anchalik Parishad (AP), Gram Panchayat president leh Gram panchayat member thlannah pawh seat an la hnem ber bawk.

Assam Panchayat inthlan hi thawh hniha neih niin December 5 leh December 9 khan vote thlak a ni a, district 26-ah leh civil sub-division-ah inthlanna hi neih a ni. Inthlan result hi December 13 khan chhiar zawh a ni a, EVM hmang loa ballot paper an hman avangin vote chhiar nan hian ni hnih chuang hman a ni.

BJP hian Zilla Parishad member seat awm zawng zawng, seat ruk an la vek a, AP member seat 21 zinga 16 an la bawk.

GP President seat 21 awmah 17 an la bawk a, ward member thlanaah pawh seat 210 awmah seat 134 an la a, hetihlai hian Congress chuan ward member seat 46 chiah an la thung.

Dilip Saikia, BJP state general secretary chuan an tum ber chu eirukna awm lo Panchayati Raj System a nih thu a sawi a, vote hi centre 40-a chhiar a nih thu sawiin an District President, in-charge, LAC in-charge-te chu an thawkho ṭha hle tih a sawi.

Polling station 23,505-ah inthlanna hi neih a ni.

Dilip Saikia chuan kum khat leh a chanve chhungin state chhung hmun hrang hrangah booth committee 27,000 an din thu sawiin, hemi hmang hian an party chuan chak taka hma an lak thu a sawi.

PM in lawmthu sawi
Prime Minister Narendra Modi chuan Inrinni khan BJP leh a thawhpuite chu hmarchhak mipuite duh ber an nih thu sawiin Assam mipuite chu an thlawpna avangin lawmthu a hrilh.

PM Modi chuan a twitter-ah tunhnai kum reilo te chhung chu BJP leh a kaih­hruai NDA chhungkua te chu hmarchhak mipuite duh ber an nih thu a sawi a, hmarchhaka hma nasa taka an sawn thu te pawh a sawi.

Assam BJP-te chuan state chhunga hna ṭha taka an thawh thu sawiin hemi avang hian an party pawh an che ṭha tih a sawi bawk a, public welfare leh Assam hmasawnna atan 'Karyakarta' chu an la hman chhunzawm zel dawn tih a chian thu an sawi bawk a ni.