Meghalaya lungalhthei khur neitu man, pakhat tlanbo

Meghalaya-a East Jaintia Hills district huamchhunga Lyntein lui bula Ksan thingtlang khuaa lungalhthei khura tang mi 13 te chu ni thum an tan hnu pawhin chhanchhuah an la ni lo a, police official-te chuan Inrinni khan chhanchhuah hna chu ngawrh taka an la thawh thu a sawi.

Police-te chuan chhanchhuaktu pawl te chuan tui pump chhuah hna hi an thawh reng thu sawiin khur chhungah hian tui a tam avangin hnathawh a harsa hle tih an sawi bawk.

Hetihlai hian Police-te chuan Zirtawpni zan khan lungalhthei khur neitu nia hriat Norman thungtlang khaw mi Krip Chulet chu an man tawh thu an sawi a, a lakah hian thubuai an ziaklut nghal tih an sawi. Lungalhthei khur hawn leh nana inhnamhnawiha puh James Shukhlain erawh a awmna chin hriat a nih loh thu sawiin a tlanbo niin an sawi.

Mi 13 tanna lungalhthei khur hi kum tam tak khar a nih hnuah kar liamta mai khan hawn leh niin hnathawh chhunzawm a ni a, khur hi a chim avangin hnathawk mi 13 an tang a ni.

Tang zinga pali hi Assam mi niin paruk hi West Garo Hills mi an ni thung a, East Jaintia Hills mi pathum an awm bawk.

Khurah hian tui a tam avangin chhanchhuah hna thawh hi a harsa hle a, tang te pawh hi an thi tawh maithei nia sawi a ni a, mahse ruang hmuh erawh a la awm lo thung.