India-Bangladesh tourism festival nei mek

Ni thum awh tur, Indo-Bangla tourism festival chu Tripura khawpui, Agartala-a Ujjayanta Palace-ah Pathianni aṭang khan neih a ni.

Pathiannia festival hawnna inkhawm buatsaihah, ram pahnih aṭangin artist eng emaw zatin hun an hmang.

Indo-Bangla tourism festival hi kum hnih chhung chu Covid-19 hri leng vangin hman a ni tawh lo a, kuminah chuan Tripura-a hri leng boruakin ziaawm lam a pan zel avangin tourism department chuan festival hi an buatsaih thei ta a ni.

He festival-in a tum ber chu ram pahnihte inzawmna tihnghet zual zel a, India leh Bangladesh inkara tourism exchange chawilar te a ni.

Festival hawngtu, Tripura deputy chief minister Jishnu Dev Varma chuan Bangladesh investor-te chu industrual sector-a scheme hrang hranga ngaihhnathiamna siamte chu hmang ṭangkai a, Tripura-ah investment nasa zawka ti turin a sawm. Bangladesh sorkar hnenah an rama sumdawng liante chu Tripura-a investment ti tura cho phur turin a chah bawk.

Bangladesh Parliament-a chief whip hlui leh, committee on estimates-a chairman ni mek, Bangladesh MP Dr Md Abdus Shahid pawhin thu sawiin, ram pahnihten inzawmna tihchakna turin tourism chu thil pawimawh tak a nih thu a sawi.

Tripura tourism minister Pranajit Singha Roy chuan hmarchhak bialah an state chu ram dangmi khualzin tlawhtu ngah ber dawttu a ni tih sawiin, heng khualzin zinga a tam zawk chu Bangladesh aṭanga kal an nih thu a sawi. Bangladesh mi, India rama zin turte chuan Tripura chu luhka atan ber an hman ṭhin thu a sawi a ni.