Assam CM-in infrastructure tihchangtlun a tiam

Assam chief minister Himanta Biswa Sarma chuan Pathianni aṭang khan Guwahati Municipal Corporation (GMC) inthlan neih tura atan a campaign ṭan. Guwahati khawpui chhung hmun hrang hrangah rally neihah thu a sawi a, khawpui chhunga infrastructure-te tihchangtlun a tiam.

CM Sarma chuan kum li chhungin sorkar hospital din belh a, chhungkaw tam zawkte hnenah tui thianghlim pekte a tiam bawk a ni. Khawpui chhunga hmasawnna hna thawhna tur hian sorkar lam aṭangin fund pawh a awm ṭha tawk a ni, a ti. "Hmasawnna hna thawhna turin fund lamah buaina a awm lo ang. Khawpui chhung tawt tihziaawmna turin sorkar office-te chu khawpui dai, Betkuchi-ah sawn an ni ang," a ti.

Chandmari-a rally a neihnaa mipui ṭhahnem tak an tel chu lawmawm a tih thu sawiin, Sarma chuan April 22-ah GMC inthlan neih turah BJP leh a thawhpuite chuan hnehna an chang ngei dawn a ni, tiin a sawi.

GMC ward 60-ah April 22 hian inthlan hi neih a ni dawn a, April 24-ah vote chhiar a ni ang. Inthlanah hian electronic voting machine (EVM) hman a ni dawn a, polling station 789 awmin, vote nei hi mi 7,96,829 an awm a ni. Vote nei zingah hian mipa 3,97,128 , hmeichhia 4,00,654 leh third gender 26 an awm.

Ward 60-ah hian candidate 208 an awm a, ward awm zat aṭanga 50% chu hmeichhe puala dah a ni bawk. Ward pathum-ah BJP candidate-te chu chuhtu awm loin an tling sa tawh.

Inthlan hi a tirah chuan April 19-a neih tura tih a ni a, mahse Assamese New Year, Bohag Bihu lawmna neih tur avangin state election commission chuan April 22-a neih turin a sawn a ni.