Lo neih uar turin AP minister-in state mipui chah

Arunachal Pradesh agriculture minister Tage Taki chuan buh leh thlai lama an intodelhna turin state mipuite chu lo nei uar turin a chah.

Itanagar bul, Nirjuli-a Longte festival kharna inkhawm a hmanpuinaah minister chuan he thu hi a sawi a, tuna Arunachal Pradesh dinhmunah chuan nitin mamawh pawh state pawn aṭanga an lakluhah a innghat a, 'consumer state' an ni mek tih a sawi.

"Kan pi leh pute kha lo neih hmangin buh leh thlai an intodelh thei a ni. Tunah chuan chaw lam chi pawh kan lakluhah kan innghat ringawt tawh a ni. Hei hi Arunachal Pradesh-a cheng mitinten kan ngaihtuah chian a ngai," tiin intodelh tura ṭan an lak chhoh leh a ṭul thu a sawi. State mipuite an tihdan phung, traditional method hmangin agriculture leh horticulture lamah state intodelh ni tura ṭan la thar turin a chah a ni.

Chief minister Pema Khandu kaihhruaina hnuaiah state sorkar chuan agriculture leh horticulture-te chu chawilar a ni mek a, hei hi state mipuite chuan an chhawr ṭangkai thiam a ṭul thu minister chuan a sawi bawk.

Arunachal Pradesh deputy chief minister Chowna Mein chuan India rama company lian, Reliance, Adani, pathanjali leh dangte chu an state-ah buy back policy hmanga contract farming ti turin a lo sawm tawh bawk a ni.