Inthlan lehah Himanta Biswa Sarma din tum tawh lo

Assam Finance Minister, Himanta Biswa Sarma chuan Assam state in inthlan an hma­chhawn leh hunah din a tum tawh loh thu a sawi.

Himanta Biswa Sarma chuan 2021 Assam inthlanah chuh a tum tawh loh thu sawiin chawlh ve hrih a duh thu a sawi a, mahse BJP in an mamawh viau erawh chuan a rilru a insual buai ve dawn hle niin a sawi bawk.

Mi tam takin an rin dan chuan Biswa Sarma hi central politics lamah a zuanluh a, nakkum Lok Sabha inthlanah pawh a din an ring a, BJP hruaitu ṭhenkhat pawhin Kaliabor-a LS inthlanah ding ve se a duh thung a ni.

Sarma hi Congress hruaitu hlun tak ni ṭhin a ni a, kum 25 chhung zet Congress party-a a tel hnuah 2015 khan a chhuahsan a, BJP a zawm a ni. Kum 2016 Assam inthlana BJP in hnehna an chan ṭum khan campaignaah a thawhhlawk hle a, punkhawmna tam takah thu sawiin BJP in hnehna an chan theihnaa thawhhlawk bera ngaih a ni hial.

BJP in hnehna an chan hnu lawk khan a kaihhruaina hnuaiah BJP kaihhruaia Congress party dodal tur North East Democratic Alliance (NEDA) din a ni leh a, Sarma hi NEDA convenor a ni nghe nghe. NEDA kaihhruaina hnuaiah hian hmarchhaka Congress sorkar chu hneh a ni zel a, Mizoramah MNF in hnehna an chan leh hnu phei chuan hmarchhak pumah Congress in sorkarna an nei tawh lo a ni.