Brigde sei ber tur hming turah rawtna tam
India rama bridge sei ber tur chu hawn a nih hma hauhin a hming tura inhnialna a tam nghal hle a, pawl hrang hrangin a hming tur rawtna an thlen hnuah Assam sorkar pawhin a hming tur rawtna a thlen ve leh.
Assam leh Arunachal Pradesh inrina, Assam lama Brahmaputra lui chunga dawh Bogibeel Bridge tir hriat hi December 25-a hawn tur hi a ni a, Prime Minister Narendra Modi chuan a hawng dawn a ni.
A hming tura inhnialna tam tak karah Assam sorkar chuan Bogibeel Bridge hming atan hian ‘Birangana Sadhani Bridge’ tih ni loa ‘Birangana Sati Sadhani Setu’ tih a rawt ve thung. Sorkar hian a hma in ‘Birangana Sadhani Bridge’ tia a hming vuah hi a rawt zet hnuah rawtna dang a thlen leh.
Northeast Frontier Railway General Manager hnena lehkha an thawnah Assam sorkar chuan a hmaa rawtna an thlen tawh chu an sut leh thu sawiin Birangana Sati Sadhani Setu tih an duh lehzawk tih a sawi.
Bogibeel bridge hming tur atan hian All Assam Ahom Sabha-a Dibrugarh District Committee te chuan PM Modi hnenah kar liamta lawk khan memorandum thehlutin Bor Axom (composite Assam) emaw Seven Sisters emaw tia hriat leh Axomiya society hmuchhuaktu nia sawi Siu-ka-pha hmingchawia lei hming phuah hi an lo rawt tawh a, ULFA (I) hel hruaitu Paresh Baruah pawhin sorkar chuan Bogibeel Bridge chu Bishnu-Jyoti Bridge an ti tur a ni, a lo ti ve tawh bawk.
August thla khan Dibrugarh MLA Prasanta Phukan chuan Prime Minister hlui Atal Bihari Vajpayee hmingchawia phuah a lo rawt ve tawh bawk.
Bogibeel brigde hi 1998 khan, khatih hunlaia Prime Minister H.D. Deve Gowda chuan a dawhna tur lungphum a phum a, 2002 khan Vajpayee chuan hnathawh ṭanna tur hawngin December 25 hian hawn a ni dawn ta a ni. Bogibeel brigde hi km 4.94-a thui niin rel kawng leh motor kawng awmkawp a ni.