Assam-a bomb tihpuah thubuaiah mi pakhat man

Assam police-te chuan December 1-a Kamakhya-Dekar­gaon Intercity Express-a bomb puah thubuaiah mi pakhat an man thu Thawhṭanni khan an sawi.

An mi man hi Binod Boro a nih thu sawiin Baksa district-a Goreswar-ah pawikhawih thu­buaiah man a ni a, thu zawhfiah a nih hnuah tun thla tira mi pali in hliam an tawrhna Kama­khya-Dekargaon Intercity Express-a bomb puakah khan inhnam­hnawihna a nei tih a inpuang niin an sawi a ni.

Baksa police-te chuan Boro hi kar liamta khan an man tih an sawi a, December 5 khan crude bomb leh pawikhawihna lehkha a kut aṭanga an man thu an sawi bawk. National Democratic Front of Boroland (NDFB) nen lehkha hi an inthleng dawn thu sawiin hel pawl BFDN hminga lehkha hi thawn a nih thu police-te chuan an sawi bawk.

Police te chuan an chhui­chiannaah Boro-a kut aṭanga bomb an man leh thla tira rela bomb puak hi a inang tih an hmuchhuak a ni.

Udalguri superintendent of police (SP) Rajveer Singh chuan Boro hian bomb pathum a siam tih a sawi a, pakhat chu a enchhin nan a hmang tih sawiin pakhat chu rela a tihpuah kha a ni a, pakhat chu an mansak hi a nih thu a sawi bawk.

An chhuichiannaah Boro hian eng hel pawl mah a zawm lo tih hriatchhuah a nih thu an sawi bawk a ni.