Assam Bogibeel Bridge hming vanga buaina Tai Ahom in kawng dang dawn

India rama lei sei ber, Assam-a Bogibeel Bridge chu kar leh lawk hian hawn a ni tawh dawn a, mahse a hming chungchanga inhnialna chuan ziaawm lam a pan thei lo.

Tai Ahom pawl te chuan Thawhlehni khan thuchhuah siamin lei hming chu Ahom Kingdom hmuchhuaktu Chao­lung Siu-ka-pha hming chawia vuah tura ngiatin kawng dan an tum thu an sawi.

He lei hming atan hian Assam sorkar chuan Pathianni khan Northeast Frontier Railway (NFR) hnenah Chutia community lalnu Sati Sadhani hmingchawia “Birangana Sati Sadhani Setu” tih vuah tura rawtna a thlen a, hemi avang hian Tai Ahom pawl te hi an lungawi lo a ni.

Sorkar hmalakna hian Chutia community-te a ngaipawimawh zawk nia a lan avangin Tai Ahom organisation hnuaia pawl hrang hrang Ahom Sabha, All Assam Tai Ahom Yuva Parishad leh All Tai Ahom Students’Union-te chuan vawiin hian sorkar kar nan kawng dan an tum.

Ahom Sabha hruaitu hlun tak pakhat chuan Swargadeo Chaolung Siu-ka-pha hming­chawia lei hming vuah chu a awm zawk hle tih sawiin hun rei tak ata tawh an ngiat thu a sawi. Greater Assamese society din tura community hrang hrang inpumkhat tir tu pawh Siu-ka-pha hi a nih thu a sawi.

Hetihlai hian Assam Chutia Students Union general secretary Mohen Bora chuan lei hming hi an duh anga vuah a nih loh chuan ṭhalai ṭhenkhat chu Brahmaputra luiah an zuangthla dawn niin a sawi ve thung.

Bogibeel Bridge hming chungchanga inhnialna hi a zual telh telh a, Mising Community-a TMPK pawl te chuan Swahid Kamala Miri hming chawia vuah turin an ngiat ve thung a, Mising community mi tam tak te chuan lei siam nan hian an ram an pe niin an sawi.

A hma in Dibrugarh consti­tuency BJP MLA, Prashanta Phukan chuan lei hming hi Prime Minister thi ta Atal Behari Vajpayee hmingchawia vuah a lo rawt tawh bawk.

Assam khawchhak lam, Brahmaputra lui chunga dawh Bogribeel Bridge tia hriat hi 1997 khan khatih hunlaia Prime Minister Prime Minister H.D. Deve Gowda chuan a siamna tur lungphum a phum a, 2002 khan Vajayee khan a siam ṭanna a hawng bawk a ni.

December 25 hian Prime Minister Narendra Modi chuan a hawng dawn a, he lei hi India rama lei sei ber tur niin kawngpui leh rel kawng awm kawp a ni.