Meghalaya lungalh-thei khura tang te chhanchhuah harsa

Meghalaya East Jaintia Hills Deputy Commissioner, FM Dopth chuan lungalhthei khura tang mi 13-te chhanchhuah hna thawh mek chu khawchhiat avangin hmasawn a harsa hle tih a sawi.

NDFR, SDRF leh police-te chuan an theih­tawp chhuah mah se khua a chhiat avang leh lungalhthei khur chhungah tui a tlin nasat avangin hnathawh an harsat hle tih a sawi bawk. DC chuan ni lengin tui chu pump chhuak mah se a tuk zingah chuan tui level chu a ngai bawk a lo ni leh ṭhin tih sawiin khur chhunga tui lut chu a tam hle tih a sawi. Khur chu a chhehvela lui nen a inzawm anih an rin hial thu a sawi.

Dopth chuan tui pump-na khawl lian hman chu an tih theih awmchhun a nih tawh thu sawiin an chhehvelah chutiang tui pump na khawl lian chu a awm lo tih a sawi a, hmun­danga mi an chah a ngai dawn tih a sawi bawk.

DC chuan NDRF tuilut thiam te chu tui level a san em avangin an la lut thei lo tih a sawi a, harsatna lian tak an tawk tih a sawi a ni.