Sonowla leh Himanta-an Gandhi chhang let
Congress President Rahul Gandhi chuan a Twitter-ah Congress in Assam leh Gujarat Chief Minister-te chu tui taka an muhil lai an kaitho tia a post chu Assam Chief Minister Sarbananda Sonowal leh Finance Minister Himanta Biswa Sarma-te chuan social media-ah vek an chhanglet nghal.
Assam Chief Minister Sarbananda Sonowal chuan a Twitter-ah Gandhi chuan Assam-a loneitute hmasawnna leh nunphung changkan chhohnaah chuan hmingṭhatna chan a tum niin a sawi. Assam leh a loneitute chungchang sawi turin dikna i neilo, tiin na takin a chhanglet. Mi zawng zawngin i kaihhruai sorkarin Assam loneitute chanai an ei dan an hre vek, tiin a chhanglet bawk.
Sonowal chuan, " Assam sorkar thutlukna siamah hmingṭhatna i chang duh niin a lang bawk a, Congress in sorkarna an chan laia thil dik lo tihna tam tak, eirukna leh Assam mipuite chanai eisaknaah te khan mawhphurhna la ngam turin ka ngen che", tiin na takin a chhanglet a ni.
Gandhi hian a twitter-ah Congress party chuan Assam leh Gujarat CM chu tui taka an muhil lai an kaitho a ni tia post in, PM erawh a la mutui hle a, mahse an la kaitho dawn niin a post.
Assam sorkar hian Nilaini khan cheng vaibelchhe 1000 hu scheme, loneitute hamṭhatna tur a tlangzarh bakah loan lak dan chungchangah pawh loneitute tana hamṭhatna tur te an puangzar a ni.
Assam Finance Minister Himanta Biswa Sarma pawhin Rahul Gandhi chu chhanglet ve nghalin, "Rahul Ji, Assam sorkar in eng debt waver scheme mah a tlangzarh lo. Short term agricultural loan-ah subsidy 25% kan offer a, he scheme hi one-time loan waiver ang lo takin chhunzawm a ni ang. I idea nen chuan a hrang hlak ang", tiin a chhanglet.