Assam-ah medical college thar pathum din dawn

Assam Health Minister Himanta Biswa Sarma chuan Nilaini khan state chhungah medical college thar pathum an din dawn tih a sawi.

Media mite hmaa thu a sawinaah Himanta Biswa Sarma chuan Kokrajhar, Nalbari leh Tinsukia-ah te chuan kumthum chhungin medical college thar pathum an din dawn tih a sawi a ni. Biswa Sarma chuan heng medical college tinah hian seat 100 ṭheuh a awm dawn tih sawiin khum 500 ṭheuh dah a ni dawn tih a sawi bawk.

Assam Chief Minister Sarbananda Sonowal chuan medical college lungphum-te hi January thla hian a phum dawn niin an sawi bawk a ni.

Assam hian tunah hian Medical college paruk- Gauhati Medical College, Assam Medical College, Silchar Medical College, Tezpur Medical College, Jorhat Medical College leh Barpeta Medical College-te an nei a, hengah hian MBBS seat 726 an nei bawk.

Tunah hian medical college pali- Dhubri, Lakhim­pur, Nagaon leh Diphu-ah te sak mek a ni bawk a, heng college sak meka seat awm zawng zawng hi 400 vel ni turah an beisei.

Medical college sak lai zawng zawng hi an zawh hnuah chuan Assam-ah chuan medical seat 1,426 a awm dawn niin Minister chuan a sawi.