Amritsar Mining engineer in Meghalaya lungalhthei khura chhanchhuah hnaah ṭanpui dawn

Meghalaya-a East Jaintia Hills district-a lungalhthei khura tangte chu chhanchhuah an la ni lo a, chhanchhuah hna thawh meka ṭanpui tur hian Amritsar Mining engineer Jaswant Singh Gill chu chahluh a ni dawn niin official-te chuan an sawi.

East Jaintia Hills district-a lungalhthei khura tang te hi a tir khan 13 an nia sawi ni mah se report hnuhnung berah chuan 14 an tang niin an tarlang leh tawh thung.

District official-te chuan state sorkar chuan nimin khan Gill hian an state a thlen an beisei thu an hrilh tih sawiin puk leh khura tangte chhanchhuah hna thawhna lamah chuan mithiam bik a nih thu a sawi.

Chief Minister Conrad K Sangma aiawhin Gill hi biak­pawh a nih thu sawi a ni bawk.

Amritsar mi Jaswant Singh Gill hian huaisen chawimawina a lo dawng nual tawh a, 1989 khan West Bengal-a Raniganj area-a lungalhthei khura tui tam tak tlinnaah mi 64 a lo chhanchhuak tawh a ni.

December 13 khan lung­alhthei khura hnathawk, miner-te hi khur chim avangin an tang a ni. Hetihlai hian National Disaster Response Force official, S K Singh chuan Thawhlehni aṭanga ruahsur avangin khura tui tling hi a pun belh zel thu sawiin hemi avanga an mangan thu a sawi.

Tun dinhmunah hian NDRF mi 100 velin chhanchhuah hna hi an thawk mek a, dan loa lungalhthei khur hi laih a nih avangin a neitu nia hriat mi pakhat chu man a nih tawh bakah midang pakhat he khur laih chungchanga inhnamhnawih mi pakhat chu zawn mek a ni bawk.

Singh chuan 25 Hp pump pahnih hmang mah se tui level chu a hniam thei chuang lo niin a sawi.

Disaster Management Minister Kyrmen Shylla chuan tangte nungdama lakchhuahna chance chu a chhe hle tih a sawi a, 2014 pawh khan South Garo Hills-ah hetiang chiah hian mi 14 in nunna an lo chan tawh thu a sawi a ni. Thilmak chiahin a chhanchhuak thei ang, tiin a sawi hial a ni.