ENSF-in tiam chin awm loin nawrh huaihawt tum

Eastern Naga Students' Federation (ENSF) chuan, Nagaland Staff Selection Board (NSSB) chungchanga an thil phut tihhlawhtling a nih loh chuan,April 21 aṭangin tiam chin awm loin sorkar laka lungawi lohna lantira nawrh huaihawt an tum.

Kohima-a DUDA guest house-a press conference an neihah, ENSF president Chingmak Chang chuan NSSB hnuaia post leh department-te dah tura an phutna pahnih chu sorkar chu a tihhlawhtling thei lo niin a sawi.

Kum 2020, September 29 khan state sorkar chuan ENSF thil phut chungchang zirchiang turin cabinet sub-committee a lo din tawh a, mahse an thil phut chungchang hi committee hian an ngaihtuah lo a, report-ah chuan hun danga ngaihtuah tura dah a ni tiin an tarlang niin Chang chuan a sawi a ni.

"NSSB din hi kan dodal lo a, mahse tlangzarh loha a ruka hna lak awm ṭhin hi kan duh lo a, an kalphung hi thlak turin kan duh a ni," a ti.

Chang chuan Secretariat-ah lungawi lohna hi lantir an tum tih sawiin, mi 1,000 vel an tel an beisei thu a sawi.

ENSF hian thil phut paruk an nei a, heng zingah hian NSSB in a huam loh, Group C post lakna tur chu board hnuaiah telh an phut a, hei bakah hian Police, Prisons, Nagaland Lokayukta, NPTO, HG/CD leh Department of Fire and Emergency Services (Sister Departments) Excise hnuaia Constable/Fireman Constable/Warder/Female Warder post bakah EF &CC-a Forest Guard lak chungchang chu NSSB hnuaiah dah an phut bawk. An thil phut tihhlawhtling tur hian kum hnih an nghak tawh tih Chang chuan a sawi a, NSSB hi a function hma ngeia tipuitling turin an phut tih sawiin, hei hi Eastern Naga tan chauh ni lo, Naga mipui zawng zawngte tana thil pawimawh a nih thu a sawi bawk.