Naga peace talk-a sorkar laipui palaiin Nagaland thleng

Naga peace talk neih meka sorkar laipuiin palai atana a ruat, AK Mishra chuan Thawhṭanni khan kar khat cham turin Nagaland a thleng. A cham chhung hian Camp Hebron-ah NSCN(IM) general secretary Thuingaleng Muivah leh an pawl hruaitu dangte a hmu ang.

Sorkar laipui aiawh leh NSCN hruaitute hi an inhmu thei a nih chuan, Naga buaina chinfel tum chungchanga NSCN(IM) camp chhunga inbiakna an neihna hmasa ber a ni ang.

Remna palai hna thawk tura ruat a nih hnuah Mishra hian Nagaland a tlawh ṭum hnihna a ni. NSCN(IM) hruaitute bakah Naga pawl paruk telna, Naga National Political Groups (NNPG) working committee hruaitute a hmu bawk dawn a ni.

Sorkar laipui hian kum 1997 aṭang khan NSCN(IM) leh 2017 aṭangin NNPG te hi a hran ve vein inbiakna hi a neihpui a ni. Kum 2015, August 3 khan NSCN(IM) nen hian framework agreement ziakin, kum 2019, November 17-ah NNPG nen Agreed Position an lo ziak tawh bawk. Mahse tun thlengin inremna tluantling erawh an la ziak lo a, Naga puala flag hran leh constitution hran phut chungchangah inremna an la siam thei lo.

Mishra hian state sorkarin Naga political issue chungchanga core committee a dinte pawh a hmu ang. He committee hi chief minister Neiphiu Rio-a'n a ho a ni. Intelligence Bureau special director hlui, Mishra hian Naga peace talk-a palai hna thawk tur hian Nagaland governor hlui, RN Ravi a thlak a ni.