Sharmila-in inthlanah Ibobi a khing dawn

Kym 16 chhung zet Manipur state-a sipai hnena thuneihna sang pekna dan, Armed Forces (Special Powers) Act hlih phuta chaw ngheia nawrh a huaihawt hnuah politics lam luhchilhtu, Irom Sharmila-i chuan state assembly inthlan neih turah Chief Minister Okram Ibobi Singh a khing dawn tih a sawi.

Kum 44 mi, Shamila-i hian nikum August 9 khan a chaw nghei a titawp a, hemi hnu October thla kha political party thar, People's Resurgence and Justice Alliance (PRJA) a din a, 2017 assembly inthlan­ah an party hminga chuh an tum thu a sawi a ni.

CM Singh hian chief minister term thumna a hmang mek a, Thoubal constituency aṭangin inthlan hnuhnung berah khan thlan tlin a ni.

Sharmila-i chuan, "Kum 15 zet hruaitu nih mah se, AFSPA hlih a nih theih nan hian eng thil mah a ti lo. Politician ho zingah he dan hi hlih tum an awm lo tih ka hriat tak avangin, inthlan lo awm turah chuh a, Chief Minister nih a, he dan hi hlih ngei ka tum ta a ni", a ti. Manipur aṭanga APFSA hlih a nih theih nan a theihtawp a chhuah chhun­zawm zel tur thu a sawi.

Hetihlai hian CM chuan Sharmila-i chu thu dik tawk lo sawiah a puh thung. Singh chuan AFSPA chu Imphal Municipal Corporation-a assembly bial pasarih aṭangin hlih a ni a, hmun dangah pawh a boruak awmdan azirin hlih zel tiam a ni bawk niin a sawi.