Tarun Gogoi-an Assam sorkar sawisel

Assam chief minister hlui, Tarun Gogoi chuan Assam-a BJP sorkar ding mek chu state chhunga zu dawr leh bar inhawn theih hun a pawhsei sak leh, dry day a tihtlem avangin a sawisel.

Tarun Gogoi chuan Chief Minister Sarba­nanda Sonowal-a kaih­hruai sorkar thutlukna siam chu ṭha a tih loh thu sawiin, zu dawr te hun rei zawk inhawn phalsak chuan an state-a ṭhalaite lakah nghawng ṭha lo a nei ngei dawn a ni, a ti.

Assam cabinet hian kar hmasa khan state excise rule a siamṭha a, zu zawrhna dawr leh bar-te chu an inhawn theih hun pawhsei sakin, tlai dar 2 aṭanga inhawn phalsak an nih ṭhin chu chawhma dar 11.30 aṭanga inhawn ṭan a phalsak a ni. Hei hi zu chhiah aṭanga sum tak zawk lakluh a nih theihna atana a tih a ni. Hei bakah hian zu hralhchhuah theih loh ni, dry day pawh a titlem bawk. BJP sorkar chuan thla khata ni hmasa ber leh ni hnuhnung ber, dry day atana hman ṭhin chu titawpin, heng niah hian zu te hralhchhuah a phalsak bawk a ni.

Gogoi chuan BJP sorkar chuan an state-ah zu aṭanga chhiah a hmuhte a pun theihna a nih dawn chuan, ṭhalai zu in an pung zel pawh pawi a tih lo tih a sawi a, sorkar chu kawng danga sum lakluh dan ngaihtuah zawk tura a duh thu a sawi.