Manipur Governor-in AFSPA sût tura sorkar laipui nawr a inhuam

Manipur governor La Ganesan chuan state chhunga dan leh thupek dinhmunin hma a sawn zel a nih chuan, Manipur state pum aṭanga Armed Forces (Special Powers ) Act, 1958 (AFSPA) sut turin sorkar laipui a nawr dawn tih a sawi.

Governor Ganesan hian ni hnih chamin Ukhrul leh Kamjong disrict-te a tlawh a, Ukhrul district-a Chingai sub-division-a Nungbi Khullen Public Ground-ah Thawhlehni khan tualchhung mite nen interaction programme an hmang a ni.

State chhung hmun ṭhenkhatah dan leh thupek dinhmunin ṭhat lam a pan zel avangin heng aṭang hian AFSPA pawh hlih a ni tih sawiin, Governor chuan state pum dinhmunin ṭhat lam a pan zel chuan sorkar laipui pawh a nawr tur thu a sawi. Hemi rual hian thil ṭhenkhat chu state sorkar buaipui thil ngaite an nih thu a sawi a, hemi chungchangah hian Chief Minister pawh hma la thuai tura ngen a tum tih a sawi bawk.

State sorkar chu theihtawpa thawhpui zel tura mipuite sawmin, a bikin sorkar hmalakna palite chu ngai pawimawh turin a ti. "A hmasa berin khua leh tuite chuan Aadhar card siam an tum ngei tur a ni a, Direct Benefit Transfer (DBT) hmanga hamṭhatna awmte an dawn theihna turin bank account pawh an hawn vek a ngai a ni," a ti. Covid-19 vaccine pek chhuah hna kalpui mekah a la thei chinte chu vaccine la vek tura ngenin, hei hi hri leng do letna pawimawh tak a nih thu a sawi.

Ramri kaltlanga ruihhlo tawlhruk ṭhin titawp chu an tan chona hautak tak a ni tih sawiin, Ganesan chuan sorkarin ramri hung hna a thawh hunah ṭha taka ṭawiawm turin a sawm bawk.