Tripura : Swine flu leng vangin vawk suat dawn

Tripura-a Sepahijala district-a sorkar enkawl vawk vulhna farm-ah swine flu a leng tih finfiah a nih tak avangin, state sorkar chuan district chhung hmun hrang hranga vawkte chu suat a tum.

Tripura animal resource department minister Bhagaban Das chuan April 13 khan sorkar farm-a vawk thi pathum sample chu Guwahati-a North Eastern Regional Disease Diagnostic Laboratory-ah enfiah tura thawn a ni a, April 16 khan report chhuakin African Swine fever avanga thi tih finfiah an ni, a ti. Sepahijala district-a Devipur-a vawk farm-ah hian vawk eng emaw zat an thi tawh tih a sawi bawk.

Minister chuan swine flu leng chu enkawl ngaihna a awm rih lo a, hei vang hian hri darh zel tur venna atan vawkte chu suat mai an ngai tih a sawi. Mahse eng huam chinah nge vawk hi an suat dawn tih an la tifel lo a, meeting neiin an ngaihtuah dawn tih a sawi.

State disease investigation centre-a veterinarian team chuan vawk tam tak thihna farm hi Thawhṭanni khan an tlawh tawh bawk. March thla chawlhkar hnuhnung ber aṭang khan he farm-a vawk vulh zinga 65 an thi tawh a, an zingah hian Europe aṭanga an lakluhte pawh an tel.