Assam police-ten Gujarat MLA Jignesh Mevani an man

Assam police-te chuan Gujarat Congress MLA Jignesh Mevani chu twitter-a a thu tweet chungchang avangin Nilaini zan khan Gujarat-a Palanpur khuaah an man a, nimin zing khan thlawhtheihna hmangin Guwahati panpui nghal a ni.

Dalit hruaitu, Jignesh Mevani hi khawtlanga inhuatna chawk tho thei zawnga a twitter-a thu a post nia sawi a nih avangin Indian Penal Code section 153A hnuaiah a lakah hian FIR thehluh anih thu a thahwpui Suresh Jat chuan a sawi. Mahse a thu tweet hi Twitter chuan a paihsak tawh a, Nathuram Godse chungchang a ni. Mevani chuan, prime minister Narendra Modi chuan Godse chu Pathian angah a ngai a, a nih chuan Gujarat-a sakhaw thil buaina thleng chungchangah remna leh muanna, boruak ṭha a awm theihna atan dil rawh se, tiin a ziak.

Palanpur khuaa man anih hnuah motor-in Ahmedabad panpui a ni a, heta ṭang hian nimin zing khan thlawhtheihna hmangin Assam hi panpui a ni leh a ni.

Mevani hi Banaskantha-a Vadgam biala independent MLA atana thlan tlin niin, tun hnaiah Congress party a zawm a ni. Man a nih thu an hriat veleh Gujarat Congress president Jagdish Thakor leh party hruaitu dangte chu Ahmedabad airport lam an pan nghal a, BJP sorkar laka an lungawi lohna thute an aupui zui nghal bawk.