AP leh Assam-in ramri buai chinfelna turin District-level committee an din dawn

Arunachal Pradesh leh Assam chuan hun rei tak state pahnihten ramri chungchanga buaina an lo neih tawh chinfel tura hma laknaah district-level committee 12 an din dawn.

Nilaini khan state pahnih chief minister-te hian ramri buaina chungchangah a ṭum hnihna atan meeting an nei leh a, hetah hian committee din hi an rel a ni. Meeting-ah hian Arunachal chief minister Pema Khandu leh Assam chief minister Himanta Biswa Sarma te bakah, state pahniha chief secretary leh senior official-te an tel.

Meeting zawhah CM pahnihte hian an twitter-ah meeting an neih chungchang hi an tarlang ve ve a ni.

Pema Khandu chuan CM level meeting vawi hnihna hlawhtling taka neih a nih thu sawiin, prime minister Narendra Modi leh union home minister Amit Shah-ten an puihna leh thurawn pekna avang tein lawmthu a sawi a, Assam CM Sarma pawhin buaina chinfel duhin hruaitu ṭha tak a nih zia a lantir a ni, a ti.

Sarma pawhin district committee dinte chuan ramri buaina neihna hmunte hi tlawhin, mipuite an kawm ang a, ramri hrula chengte leh state pahnih sorkarte ṭha tih dan anga inremna siam theih ngei a beisei thu a sawi.

Assam leh Arunchal Pradesh hian ramri, km 804-a thui an nei a, heng zingah hian buaina neihna point 1,200 a awm.

Nikum khan Arunachal Pradesh chuan ramri buaina an neihna hmunte zirchiagn a, a chinfel dan ngaihtuah turin High Power Ministerial Committee a lo din tawh a, hetah hian political party, community-based organisation leh zirlai pawl aiawhte an tel a ni.