Nagaland doctor-te'n an nawrh titawp rih

Nagaland In-Service Doctors’ Association (NIDA)-in medical doctor-te pension kum tihsan phuta sorkar nawrna atana ni thum chhung a huhoa casual leave an lak hnuah, cabinet meeting-in an thil phut ngaihtuah a tum avangin nimin aṭang khan nawrh hi a titawp rih.

State sorkarin doctor-te thil phut hi tihfel a tiam aṭanga kum khat hnuah pawh thutlukna engmah a la siam loh vangin, April 18 aṭang khan doctor-te chuan a huhoin ni thum chhung chawlh an la ta a ni. Ni thum chhunga an thil phut hi a ngaihtuah loh chuan tiam chin awm loa nawrh huaihawtah state sorkar chu an vau zui bawk.

Doctor-te hian medical doctor-te pension kum chu kum 2016, May thlaa prime minister Narendra Modi-a'n rally-a a lo sawi tawh anga siam an phut. PM hian ram chhunga medical doctor indaih lohna avangin an penison kum hi kum 65-ah tihpun a nih thu a puang a ni.