Meghalaya sorkarin Athena Power, JayPee Group nena MoA ziah a sut

Meghalaya power minister Prestone Tynsong chuan Athena Power Private Limited leh JayPee Group nena Kynshi stage 1 leh Kynshi stage 2 hydro electric power project siamna tura Memorandum of Agreement (MoA) an lo ziah tawh chu state sorkarin a sut tih a sawi.

Minister Tynsong chuan project developer-te hian hna an thawh chhunzawm theih loh thu an sawi hnuah, inremna siam hi tihtawp a ni tih a sawi. "Kum 2007 khan sorkar chuan MoA hi a ziahpui a, mahse tun hnaia review meeting neihah project developer ṭhenkhatin hna an thawh chhunzawm theih loh tur thu an sawi avangin, MoA tihtawp hi kan rel ta a ni," a ti.

Power Minister chuan kum 2012-a Wah Umian Stage III thawhna tura NEEPCO Shillong nena MoA ziah chu hmalak mek a nih thu a sawi a, a buaipuitu district collector chuan ram hi an tifel dawn hnai tawh a, tihfel a nih veleh project hi thawh ṭan a nih tur thu a sawi a ni.