Assam : Guwahati Municipal Corporation inthlan nei

Kum kua hnuah nimin khan Guwahati Municipal Corporation (GMC) inthlan chu neih a ni a, zing dar 7 aṭangin vote thlak ṭan a ni. Inthlanna felfai tak a awm theihna atan venhimna pawh khauh taka kalpui a ni.

GMC-a ward 57-ah inthlan hi buatsaih a ni a, ward 60 awm zingah ward pathumah chuan BJP candidate-te chu chuhtu awm loin an tling sa a ni. Ward 57-ah hian candidate 197 an awm a, vote nei mi 7,96,829 awmin an zinga 3,96,891 chu mipa an ni a, hmeichhia vote nei 3,99,911 leh third gender 27 an awm bawk.

Vote thlakna atan a ṭum khatna turin Electronic Voting Machines (EVMs) hman vek a ni a, polling station 757 awmin, heng zinga 80 chu hmeichhe hlangin an enkawl a ni. April 24-ah vote tlate hi Maniram Dewan Trade Centre-ah chhiarin inthlan result hi puan nghal a ni ang.

BJP chuan ward 53-ah chuhin, a thawhpui AGP chuan ward pasarih-ah a chuh thung. Congress party chuan ward 54-ah candidate an siam. GMC inthlanah hian Aam Aadmi Party (AAP) leh Assam Jatiya Parishad (AJP) chuan a ṭum khatna atan an chuh ve bawk.

GMC inthlan hnuhnung ber hi kum 2013 khan neih a ni a, hemi ṭum hian Congress an chak a ni. Mahse kum 2016 khan BJP -in state sorkarna a chan hnuah council-ah member an neih belh zel a, Congress chu minority a ni chho leh ta zawk a ni.