Tripura Congress team-in CEC an hmu

Tripura Congress team chuan Ningani khan chief election commissioner, Sushil Chandra an hmu a, inthlan dik leh felfai tak a awm theihna tura inrawlh turin an ngen.

Congress team hi AICC observer for Tripura, Dr Ajoy Kumar-a'n a ho a ni. CEC hnenah hian state chhung dinhmunte a hmun ngeia enfiah tura official team tir turin an ngen bawk.

Dr Kumar chuan tharum thawhna nen chuan inthlanna felfai tak buatsaih a har thu sawiin, tun hnaia civic body inthlan neihna hmun hrang hranga buaina thleng chuan inthlan lo awm leh zel turah pawh buaina a chhuah leh zel hlauhthawnna a tilian hle tih a sawi. Tripura-a BJP rorelna hnuaiah dan leh thupek a mumal lo hle a ni, a ti.

Police-te hmuh lai ngeiin Congress party office beih a ni a, an party hruaitute pawh kut thlak an nih thu Dr Kumar chuan a sawi. BJP thlawptute hian Congress mi leh sate chu an bitum reng a, eptute chu nitin beih an ni, tiin a sawi. State chhung dinhmunte hi CEC hnenah chuan thlen vek a nih thu leh, a ni pawhin dawhthei taka lo ngaihthlak sakin, an theih anga hma lak zel an tum thu a lo hrilh tih a sawi.

Kumar chuan police-te chetdan chu a lungawithlak loh thu sawiin, buaina leh pawikhawihna vawi tam tak a thleng chungin police-te BJP mi leh sate chungah action an la ngai mang lo a ni, ati. Mahse Congress party-in Election Commission hnena rawtna a thlente chu uluk taka an ngaihtuah a, Central Armed Forces-te dah a nih ngei a beisei thu a sawi bawk.