Nagaland sorkarin doctor-te pension kum tihsan remti

Nagaland-a doctor-ten pension kum tihsan phuta ni thum chhung mass casual leave an lak hnuah, state sorkar chuan thu delhkilh awmin an thil phut hi tihhlawhtlin a remti.

State sorkar thupuangtu, Mmhonlumo Kikon chuan cabinet meeting-in doctor-te thil phut hi ngun taka a ngaihtuah hnuah, pension hun kum 62-a tihsan an phutna chu a remti a, mahse clinical sector-ah chhawr nawn leh an remti ve thung tur a ni," a ti.

Nagaland In-Service Association (NIDA) hian an thil phut nawrna atan hian April 18 aṭang khan ni thum chhung a huhoin casual leave an la a ni. Hemi chhunga an thil phut hi sorkarin a ngaihtuah loh chuan tiam chin awm loa nawrh huaihawtah an vau a, mahse cabinet meeting-ah ngaihtuah a nih tak avangin nawrh hi an titawp a ni.

Kikon chuan medical college-a thawk tura dil duh tan kum bithliah hi 65-ah tihsan a ni bawk tih a sawi a, mahse pension an nei lo thung ang, tiin a sawi.