Assam zirlai pawlin ramri chungchanga inremna siam duh lohna lantir

Assam-a Karbi Students Assocation (KSA) chuan tun hnaia Assam leh Meghalaya-in ramri chungchanga inremna an siam chu sawiselin, duh lohna an lantir.

Zirlai pawl hian West Karbi Anglong-a Mokoilu-ah lungawi lohna lantirin kawng an zawh a, state pahnihten ramri-a buaina chinfelna tura 'give and take' policy hmanga inremna an siam chu an duh loh thu an sawi.

Kawngzawhnaah hian KSA member ṭhahnem tak telin, eng kawng mahin Karbi Anglong area chu Meghalaya hnenah hlan a ni dawn lo tih an sawi a ni.

KSA publicity secretary Moniram Kongkat Teron chuan 'give and take policy' chu an duh lo tak zet tih sawiin, an thil phut hi sorkarin a ngaihtuah loh chuan nawrh huaihawt chhunzawm zel an tum tih a sawi. Kawngzawhtute hian Karbi Anglong Autonomous Council CEM, Tuliram Ronghang hnenah memoradum thehlut nghalin, an lungawi lohna chungchang chu Assam sorkar sawipui turin an ngen.

State pahnihten ramri buaina an neihna hmun 12 zinga hmun parukah tun hnai khan inremna hi siamin, an buaina neihna sq km 36.79-a zau chu an insem a ni. Inremna an siam angin Assam lam hian sq km 18.51 changin, Meghalaya hian sq km 18.28 a chang bawk.