Tripura-in industrial scheme siamṭhat tlangzarh

Tripura sorkar chuan investor tam zawk hip luhna tura industrial scheme a siamṭhat chu Inrinni khan a tlangzarh a, he scheme thar hian an state economy lamah pawh chak zawka hmasawnna tur kawng a hawng dawn niin a sawi.

Chief minister Biplab Kumar Deb chuan hemi chungchang hi a twitter-ah tarlangin, MSME investment-a state subsidy hmuh theihna tur chu Rs vaibelchhe khatah tihsan a ni, a ti. A hma chuan upper limit hi Rs nuai 60 chinah bithliah a ni.

"Tripura Industrial Investment Promotion Scheme (TIIPIS)-2022 chu nasa taka siam danglam a ni a, hei hi state-a investment a pun theihna tura tih a ni," a ti. Manufacturing sector lam tihlenna turin,state pawn aṭanga secondary raw material phurhnaah pawh 50% subsidy pek a ni dawn tih CM chuan a sawi bawk. State chhung bika raw material-a transport subsidy chu 10% a ni thung ang.

ISO leh BIS-a fee lak ṭhin chu state sorkarin a rul let leh dawn tih CM Deb chuan a sawi a, intodelhna tura Made in Tripura chawilarna kawnga an hmalakna chuan economic development lamah kawng thar a hawng dawn a ni, a ti.

Cooperative leh self-help group-ten industry an din duh a nih chuan industrial scheme thar hnuaiah subsidy hrang hrang an hmu thei dawn tih Industries & Commerce department senior official chuan a sawi. Rubber, bamboo, tea, gas, horticulture, tourism, healthcare service leh water management lam chu incentive peknaah dah pawimawh hmasak an nih tur thu a sawi a ni.