Mask ṭha tawk lo supply vangin Manipur doctor man
Manipur-a vigilance and anti-corruption police-te chuan health department-a senior medical officer chu Churachandpur-a district hospital-a N95 mask ṭha tawk lo supply chungchangah inhnamhnawiha puhin Thawhlehni khan an man.
Official man hi Dr M Dinesh Singh a ni a, National Health Mission (NHM), Manipur-a central medical store, directorate of health services cum state nodal officer-ah senior medical officer a ni. Dr Singh hi supply order tichhuak si loa firm hrang hrang aṭanga medical protective gear lei chungchangah a khaipa nia puh a ni a, an hmanraw lei zingah hian N95 mask pawh a tel a ni.
Heng protective gear-te hi Churachandpur district hospital-ah pek niin, mahse an quality a chhe hlawm hle nia sawi a ni. Hei vang hian man niin, nimin khan Imphal West-a special judge court-ah hruai a ni. District hospital-a isolation ward chuan N95 mask 200 ṭha lo supply a nih thu April 14 khan an report a, heng mask leh hmanraw dang ṭha tawk lo supply-te chu thawn kirin a tharin thlak an ni. Hemi hnu hian police-te chuan Imphal-a Central Medical Directorate-a N95 mask la awmte chu man sak nghalin, state health department-a official ṭhenkhat lakah thubuai an ziak lut nghal bawk.