Manipur UNC-te'n kawngpui dan chhunzawm zel dawn

United Naga Council (UNC)-te chuan Election Commission of India-in Manipur assembly election neih hun tur puang tawh mahse, National Highway (NH) dan an chawlhsan dawn lo tih Nilaini khan an sawi.

UNC thuchhuah chuan, an thil phut a hlawhling lo a nih chuan, Naga-te chenna bialah assembly election chu boruak munaawm tak hnuiah neih theih a ni dawn lo tih an sawi. An thil phut a hlawhtlin hma loh chuan NH an dang chhunzawm zel dawn tih sawiin, an thil phut chu inbiakna hmanga chinfel an duh rualin, state sorkar chu hma la chak tawk loah an puh. Election Commission-in election neih hun tur puang tawh mahse, an thil phut nawr nan NH dan loh chu duh thlan tur dang an nei chuang lo niin an sawi bawk.

UNC-te hian November 1 aṭang khan NH 2 leh 37 an dang chat a, hengte hi Manipur chakkhai lamna kawngpui pawimawh an ni. State sorkarin Naga-te'n thlatute aṭanga an chenna ram nia an chhal Sadar Hills, district-a hlangkai tura hmalakna duh loin kawngpui dan hi kalpui a ni. Naga-te hian sorkarin Jirbam district puitlinga hlankai tumna chu an dodal a, hei bakah hian state sorkarin district thar pasarih dinbelh chu an duh lo tih an sawi.

Dodalna awm mahse state sorkar chuan Kangpokpi, Tengou­pal, Pharzol, Kakching, Noney leh Kamjongin-te chu district puitlingah a puang tawh a ni. Hetih lai hian UNC-te'n a tir aṭanga nasa taka an dodal Sadar Hills leh Jiribam-te chu tun thlengin district-ah puan an la ni lo thung. Naga pawl hrang hrangte chuan UNC hmalakna hi thlawpin, sorkar chu a hmalakna tawpsan turin an nawr ve reng bawk.

District duh lohna lantirtute hian buaina vawi eng emaw zat an chawk chhuak tawh a, pawl hrang hrangte chuan UNC-te chu an hmalakna tawpsan tura ngenin, lungawilohna te pawh an lantir ve bawk. Hetiang boruak a nih avang hian sorkar laipui pawh a inrawlh a, venhimhna thawk turin para-military force sang eng emaw zat a tirlut tawh a ni. Kum 2016 December khan Minister of State for Home Affairs Kiren Rijiju chuan boruak sosang zel tur veng turin venhimhna thawktu tirh luhbelh an nih tur thu a lo sawi tawh a, para-military force company 150 zet tirhluh zui an ni. Hetih lai hian Naga hel pawl Nationalist Socialist Council of Nagalim-Isak-Muivah (NSCN-IM)-te chuan sorkar laipui chetdan an dem thu an lo sawi ve mek bawk.

Election Commission of India chuan Nilaini khan Manipur bakah state pali-a assembly election neih hun tur a puang a, February 4 aṭanga March 8 chhungin state parukah neih a ni ang. Manipur bikah election hi thawh hniha kalpui tura ruahman a ni a, a thawhkhatna chu March 4-ah neih a ni ang a, a thawhhnihna leh a tawpna ni bawk chu March 8-ah neih a ni ang. United Naga Council (UNC)-te'n National Highway dan tawpsan an tum loh thu an puan leh tak avang hian boruak muanawm tak hnuiah state assembly election hi kalpui theih a ni a ngem tih chu zawhna awm mek a ni.

Hetih lai hian Nilaini khan Delhi Manipuri Society-te chuan hun rei tak chhung UNC-te'n NH an danchah avanga lungawilohna Delhi-ah an lantir. Lungawilohna lantirtute hi New Delhi-a Jantar Mantar-ah an pungkhawm a, kawngpui dan tihtawp thuai an phut thu an au chhuahpui a ni. Delhi Manipuri Society vice-president Sangeeta chuan, NH dan chah chu mipuite zahlohna a nih thu sawiin, mipuiten nitin mamawh ei leh in tur bakah damdawi lam thlenga harsatna an tawk chu pawi a tih thu a sawi.

Hetih lai hian Joint Naga Civil Society-te chu Naga mite chunga tharum thawhna thleng duh lohna lantirin, Manipur Bhawan kawtah an pungkhawm. Thuchhuah an siamah chuan, Manipur-ah dan leh thupek mumal taka kalpui theih a nih loh avangin President Rule puan an phut a, state sorkarin district thar a din dan chu dankalh a nih thu leh, UNC hrauitu pahnih hren mek te chu chhuah an phut thu an sawi. Naga-te chu Manipuri security force-te thlazar hnuiah an him tawk lo tih an sawi bawk.