Financial system kalpui danah mipuiten rinna an nghat ngam lo : Tarun Gogoi

Assam chief minister hlui Tarun Gogoi chuan, Prime Minister Narendra Modi-a kaihhruai sorkarin financial system a kalpui danah mipuiten rinna an nghat ngam lo niin a sawi.

Gogoi chuan, PM Modi-a'n Rs 500 leh Rs 1,000 note tih thih ni mahse mipuite tawrhna a thleng dawn lo niin sawi mahse, mipuiten tun thlengin harsatna an la tawk a ni, a ti. Financial system kalpui danah mipuiten rinna an nghat ngam lo tih sawiin, ram pumah sum indaihloh-na a nasa tulh tulh niin a sawi. Engtikah nge harsatna chinfel a nih dawn hriat a ni lo a, ram pumin sum leh paiah harsatna a tawk mek a ni, a tibawk. Sum lama harsatna awm mek chhanah Modi-a kaihhruai sorkar chu mawhphurtu nia sawiin, mipuite harsatna tawh mek sutkian kawngah chak zawka hmalak a phut thu a sawi.

BJP chu Assam assem­bly election neih dawna an au hla te bawhzui lohah puhin, Assam chu eirukna awmlohna state-ah siam an tiam a, mahse chumi tithawltling tura hma la leh si loah a puh. Pawisa tih thih avanga Assam sorkarin sum a hloh zat chu cheng vaibelchhe 1,000 vel zet niin a sawi a, state sorkarin chhiah aṭanga a sumhmuh zat pawh 12% zetin a tlahniam niin a sawi bawk.