Nagaland-ah hri kai 656 tling tawh
Nagaland state-ah Covid-19 kai an pun belh zel a, nimin khan hri kai hmuh thar mi 12 awmin anni nen hian hri kai hmuh tawh hi mi 656 an tling tawh a ni.
Health minister S Pangnyu Phom chuan nimina sample enfiah 432 zingah 12 chu a positive tih sawiin, an zinga pakua hi Dimapur-a mi niin; Kohima, Mon leh Mokokchung district-ah pakhat ṭheuh an awm bawk. Hri kai hmuh tawh zinga 303 chu enkawl dam an ni tawh a, kai mek hi 353 an la awm a ni.
Nagaland Commissioner officer canteen-a thawk pakhat chu Covid-19 a kai tih hmuh chhuah a nih avangin nimin aṭang khan darkar 48 chhung atan he office hi khar nghal a ni. Canteen-a thawk hri kai hmuh chhuah hi Kohima-a fronline worker, tunhnaia Covid-19 kai tih hmuh chhuah nena inkhawihfuhna nei nia sawi a ni.