Media house-ten Manipur sorkar news boycott

Manipur media house-te chuan an state-a BJP sorkarin advertisement bill a tihfel sak duh loh vangin Pathianni aṭang khan state sorkar leh BJP news an boycott.

All Manipur Working Journalists' Union leh Manipur Hill Journalists' Union-te chuan kar liam ta Inrinni khan Imphal-a Manipur Press Club-ah joint meeting an nei a, he meeting-ah hian sorkarin advertisement bill la tangte a tihfel sak hma chu sorkar news boycott hi an rel a ni. Bill tangte hi tifel turin vawi tam tak an ngen tawh tih an sawi.

Manipur-ah journalist 600 vel awmin Manipuri, English leh tualchhung ṭawnga nitin chanchinbu chhuak hi 34 a awm a, periodical pakua, television news channel 11, news agency pahnih leh web portal eng emaw zat an awm.

Meeting hian Inrinni zan thleng khan state sorkar leh Manipur BJP chu advertisement bill a tikhawtlaite pe fel turin an ti a, mahse hun pek chhunga engmah tihfel a nih loh avangin Pathianni aṭang khan an boycott ta a ni. Hemi chhung hian Manipur sorkar, rorellai BJP leh NPF-te chanchin leh a kaihhnawihte chu engmah tihchhuah a ni dawn lo a, sorkar advertisement-te pawh an la lo bawk ang. Sorkarin bill a la tikhawtlai mekte a pek fel hma emaw, media house-te nena inremna an siam emaw hma chu news boycott hi kalpui an tum.