Tripura-ah ASF vangin vawk suat

Tripura Animal Resource Development (ARD) department chuan Sepahijala district-a sorkar enkawl vawk vulhna, Debipur farm-ah vawk hri, African Swine Fever (ASF) kai an awm avangin he farm-a vawk 165 chu an suat.

Debipur farm-ah ASF kai an awm tih finfiah a nih hnu leh, sorkar laipui lam aṭanga thu an dawn hnuah Inrinni aṭang khan farm-a vawk te hi suat an ni.

ARD director, DK Chakma chuan vawk suat tur hian team hnih siam an nih thu sawiin, Inrinni leh Pathianni khan vawk 265-te chu veterinary officer-te enpuina hnuaiah suat an nih thu a sawi.

April 13 aṭang khan Debipur farm-ah hian vawk 27-te chu a chhan hriat lohin an thi a, hei vang hian an blood sample-te chu Guwahati-ah enfiah tura thawn an ni. North Eastern Regional Disease Diagnostic Laboratory (NERDDL), Guwahati chuan farm-a vawk thi sample an thawnah hian ASF hmuh a nih thu a nemnghet a ni.

Chakma chuan ASF hmuh anih avang hian state pumah pawh hriattirna tihchhuah nghal a nih thu leh, vawk leh vawkte chu venthawn thilah hmun dangah phur kual lo turin a ti bawk. Hemi rual hian African Swine flu ni loin, African Swine Fever (ASF) kai an nih avangin heng vawk sate hi ṭha taka chhum hmin chuan mihring tan ei a pawi lo tih a sawi.