Meghalaya sorkarin khualzin tan bik gambling phalsak dawn

Meghalaya sorkar chuan an state-ah gambling chu an state tlawhtu khualzin tan bik legalise a tum.

Law and taxation minister James PK Sangma chuan states sorkarin gambling leh online betting chu legalise tum mah se, khualzin tan chauh a nih tur thu leh, state chhung mite an khelh phalsak a ni dawn loh thu a lo sawi tawh a ni.

Kumin February thlaa state sorkarin Meghalaya Prevention of Gambling Act, 1970 a sut hnuah khan Meghalaya chu online gaming, online betting leh gambling legalise tumin hma lak a ni a, UK India Business Council (UKIBC) nen pawh meeting neih a ni. Meeting zawh hian Sangma chuan report, Gaming for Growth – India’s Sport and Gaming Market Potential a tlangzarh zui a ni.

Report-a a landanin, Meghalaya hi India rama gambling leh gaming ngaihhna thiamna ber state niin, legalise a nih chuan mi tam tak tan hna thawh tur siamin, chhiah pawh tam tak an lakluh theih phah dawn tih a tarlang.

State sorkarin kaihhruaina a siamah, Meghalaya-a gambling leh gaming activity-a tel tur hian khualzinte chuan document an neih a ngai ang. Legalise a nih hunah chuan Meghalaya hi India ram state zinga online leh offline gaming leh gambling phalsak state pathumna a ni dawn a, a hmain Sikkim leh Nagaland-te'n an lo phal tawh bawk a ni.