Assam-ah Covid-19 vanga thi mi 21 awm tawh

Assam state-ah Covid-19 hri vangin nimin zing khan mi pali an thih belh leh a, heng mite nen he hri vanga thi hi mi 21 an awm tawh. Thawhlehni khan he hri vang hian mi pahnih an lo thi tawh bawk.  Thawhlehni kha Assam-a hri kai hmuh chhuah tam ber ni a ni leh a, mi 814 in Covid-19 an kai tih hmuh chhuah a ni a, an zinga mi 588 chu Guwahati khawpuia mi an ni. 

Health minister Himanta Biswa Sarma chuan Assam-a Covid-19 kai hmuh chhuah tawh chu mi 13,336 an tling tawh tih sawiin, an zinga 8,329 chu an dam tawh a, enkawl mek mi 4,988 an awm tih a sawi. Guwahati khawpui bikah hri kai an pun chak avang leh, pawn lama zin chhuahna nei lo zingah hri kai hmuh belh zel an nih avangin sorkar chu hri darh tur venna kawng khat atan containment zone-ah door-to-door testing a kalpui mek. Khawpui chhung bikah hian July 12 thleng complete lockdown puan a ni bawk a ni. State chhunga district pasarih chuan Guwahati-ah hri kai an pun chak avangin zin an khap tawh bawk.