Boruak awmdan azirin total lockdown puang leh maithei : Meghalaya

Meghalaya-ah coronavirus kai hmuh belh zel an ni a, state sorkar chuan an boruak awmdan a zirin a ṭul chuan state pumah total lockdown puan a ngai leh maithei tih a sawi. 

Thawhlehnia Shillong-a press conference a neihnaah, deputy chief minister Prestone Tynsong chuan total lockdown puan a nih dawn leh dawn loh chungchanga zawhna chhangin, "Kan boruak hi a ṭha lo zel a nih chuan thlan tur dang a awm dawn lo a ni," a ti. 

Hemi rual hian mipuite chu chiai lo turin a chah a, thil pawimawh leh ṭul tak a nih loh chuan pawn lamah chhuak tam lo turin a ngen nghal bawk a ni. Meghalaya-ah hian Thawhlehni zan khan hri kai hmuh thar mi panga an awm leh a, heng mite nen hian hri kai hmuh chhuah tawh hi mi 95 an awm tawh a, an zinga 43 chu enkawl dam an ni tawh.