Bail-a chhuah a nih hnuah Gujarat MLA Mevani man leh nghal

Assam police-ten prime minister Narendra Modi sawiselna lam thu a twitter-a a ziah avanga an man, Gujarat MLA Jignesh Mevani chu Thawhṭanni khan Kokrajhar district court-in bail-in a chhuah a, mahse chhuah a nih hnu hian police-ten an man leh nghal.

Police-te chuan Mevani man a nih lehna chhan hi an sawilang mai lo a, mahse a hnuah ni nga liam taa hmeichhe police officer pakhat laka a chet mawi loh vang niin an sawi a ni.

Gujarat MLA hi April 18-a PM Modi sawiselna a tweet chungchanga Assam BJP hruaituin complaint a thehluh avangin kar liam ta Nilaini zan khan Assam police-te chuan Gujarat-ah an man a, a tukah Guwahati-ah hruai nghal a ni. Ningani liam takhan Korajhar district-a chief judicial magistrate court chuan bail a dilna hnawlin, ni thum chhung police custody-a awm turin a ti. Pathianni khan bail dilna hi ngaihtuah nawn leh niin hnawlsak a ni leh a, judicial custory-a ni khat awm tura tih a ni leh a ni. Thawhṭanni khan a bail dilna hi phalsak a ni ta a ni.

Bail a dilna phalsak a nih hnu hian police-te chuan Mevani hi man leh nghalin, Barpeta district an panpui a ni. Mevani chuan a chunga thil thleng chu BJP leh RSS-ten amah tihchhiat tuma an phiarna a ni tih a sawi a, a ukil Anshuman Bora pawhin Mevani man leh a nih chungchanga an puh dan chu thil nunrawng thlak tak a ni, a ti. Ni thum chhung police kuta a awm lai leh, bail a dilna ngaihtuah a nih chhungah he an puhna chungchang hi engmah sawichhuah a ni lo, a ti. Barpeta court-ah bail dilna hi an thehlut leh nghal dawn tih a sawi.

Assam leh Gurajat hi BJP sorkarna state ve ve a ni a, Mevani hi independent MLA niin Congress party a thlawp a ni. Mevani chuan, "BJP leh RSS hian Rohit Vemula, Chandraskher Azad te tihchhiat tumin an lo bei tawh a, tunah kei min bitum ve leh ta a ni," tiin a sawi.