Tawang-ah IIM-Shillong satellite centre hawng
Union skill development and entrepreneurship minister Dharmendra Pradhan chuan Thawhṭanni khan Arunachal Pradesh-a Tawang district-a IIM-Shillong satellite centre chu virtual hmangin a hawng.
Indian Institute of Management (IIM), Shillong leh hmarchhaka state sorkar thawhdunna hmasa ber hnuaiah, satellite centre hi din a ni. Hemia tan hian Arunchal Pradesh sorkar leh Dr. APJ Abdul Kalam Centre for Policy Research & Analysis, IIM Shillong chuan Memorandum of Undertanding (MoU) an ziak a ni.
AP-a administrative officer-te thuam chakna leh zirtirna, a bikin management skill leh policy siamna kawngah he satellite centre hian hna a thawk dawn a ni. Centre hawngtu, Union Minister chuan institution rintlak, IIM-Shillong nena an thawhdunna hian inrelbawlna ṭha leh hlawhtling siamna turin kawng a hawng dawn a, hei hian khua leh tuite hlimna a thlen dawn a ni tiin, chu chu sorkar thil tum ber a nih thu a sawi.
Arunachal Pradesh chief minister Pema Khandu pawhin thu sawiin, an thawhdunna kaltlang hian an state-a startup ecosystem chawilarna turin training and entrepreneurship development programme-te pawh neih an beisei tih a sawi. IIM-Shillong chuan an state tana hmasawnna ngialnghet zawk thlenna turah a puih ngei a rin thu a sawi. Permanent campus pawh siam a ni thuai dawn tih a sawi a ni.
CM Khandu chuan Centre hian Indian Army, paramilitary force leh central agency hrang hrangte officer, Arunachal Pradesh-a thawkte tan pawh training a la pe thei dawn a ni, a ti. Office-te bakah, state MLA-te pawh he centre-ah hian training tir an tum tih a sawi bawk.