Meghalaya CM-in Grassroots Music Project a hawng

Meghalaya chief minister Conrad K Sangma chuan Thawhlehni khan music leh musician-te chawilarna tur, "Meghalaya Grassroots Music Project" a hawng. He project hawnna inkhawmah hian musician lar, Lou Majaw chu chawimawina, 'Lifetime Achievement Award' a hlan nghal bawk.

"Meghalaya Grassroots Music Project" hi state sorkarin rimawi lama talent nei ṭhate a puihna leh chawilarna tura duan a ni. Project hnuaiah hian state chhung hmun hrang hranga gig leh music show buatsaihte chu state sorkar hian puiin, musician-te tan an thiamna an phochhuah theihna tur platform-te a buatsaih sak ang. Artist-te state pawn lama an zinchhuah theihna turte pawh a ngaihtuahpui dawn bawk a ni.

Chief Minister chuan he programme dangdai tak hi an state-a musician-te chawhphur a, inphochhuahna hun ṭha siamsak a, eizawnna tlaka siam a, tourism nena inthlunzawm tirna tura an duan a ni tih a sawi. 'Rock Capital of India' tia sawi ṭhin, an state-ah chuan he programme kaltlang hian music chawilar lehzual an tum tiin, state sorkar chuan music genre hrang hrang tan pawh hun te siamin, khualzin hipna hmanrua atan a hmang dawn a ni, a ti. State sorkar chuan vantlang hmun hrang hrangah street performance platform-te siamin, music cafe platform-te pawh a buatsaih bawk ang.