Tripura-a school tinah child rights club din dawn

Tripura Commission for Protection of Child Rights (TCPCR) chairperson Nilima Ghosh chuan child rights commission leh Tripura school education department thawk dun chuan, state chhunga school zawng zawngah child rights club an din dawn tih a sawi. He club hian naupan laia inneih tir - child marriage, naupang tihnawmnah leh kum tling lote hnathawka chhawr luih an awm tihte an enfiah ṭhin dawn a ni.

Nilima Ghosh chuan, "Education minister Ratan Lal Nath pawh hemi chungchang hi kan sawipui tawh a, school tina club din tur hian a ṭul angte buaipui mek a ni. Heng club-te hi fund kan pe dawn a, naupang puih ngaite tan an thawk ṭhin dawn a ni. Naupang zingah tihnawmnah tuar, inneih tir leh harsatna tawk an awm chuan club-te hian kan hnenah an rawn report thuai ṭhin ang," tiin a sawi.

Club hi din thuai an tum tih sawiin, school exam zawh hun an nghak tih Ghosh chuan a sawi. Education department chuan exam zawhah he project hi buaipui nghal an tum. School zirtirtute chuan naupangte hi an dikna chanvo neih chungchangah zirtirna te pein, TCPCR chuan a ṭul dan azirin counsellor-te tirin, naupangte hun an hmanpui ṭhin dawn a ni.