Meghalaya-ah border haat 2 hawn belh dawn

India leh Bangladesh chuan ram pahnihte inzawmna tihnghehna kawng khat atan, May thla hian Meghalaya state-ah ramri bazar, border haat pahnih hawn belh an remti.

Bazar siam thar tur pahnih nen Meghalaya-ah hian border haat hi pali a awm dawn a ni. Border haat siam tawh pahnihte hi Covid-19 hri leng vanga kum hnih dawn khar an nih hnuah hawn an ni leh tawh a ni.

Official-te chuan East Khasi Hills district-a Ryngku border haat chu May 12-ah hawngin, South West Khasi Hills-a Nalikata border haat chu May 16-ah hawn a ni dawn tih an sawi.

Border haat hi ram pahnih ramri hrula chengten an thil siam leh tharchhuahte an zawrhna hmun a ni a, hei hi ram pahnih mipuite inkarah pawh inpawhna ṭha tak a siam phah ṭhin. Tualchhung mite tan pawh eizawnna leh inhlawhna tam tak a siam phah bawk.