Arunachal CM official-in BJP-ah lawmlut

Bharatiya Janata Party (BJP) National Executive chuan Inrinni khan, Arunachal Pradesh Chief Minister Pema Khandu chu an party-ah official-in an lawmlut.

BJP hian January 6 leh 7 khan New Delhi-ah National Executive meeting an nei a, he hunah hian state panga-a assembly election neih tura party hmalakna an thirho bakah thil pawimawh eng emaw zat an sawiho a ni. BJP National President Amit Shah chuan, Aruanchal CM Pema Khandu chu National Executive chuan thinlung takin an party-ah an lo lawm tih sawiin, amah bakah MLA 33 te chu an party tana ṭha taka thawk turin duhsakna an hlan tih a sawi. Tun hnai khan Pema Khandu bakah, MLA 33 te chuan People's Party of Arunachal (PPA) chhuahsanin BJP hi an zawm a ni.

BJP National President Amit Shah chuan, Khandu chu an party tana mi ṭangkai tak ni turin an lawmlut tih a sawi a, amah zuitu MLA-te pawh an party chuan thinlung takin an lo lawm tih a sawi. "Aruanchal Pradesh-ah hian Khandu kaihhruaina hnuaiah BJP sorkar ṭha tak a ding thei ngei ang tih kan ring a, hruaitu ṭha tak a nih avangin amahah rinna kan nghat ngam a ni" Amith Saha chuan a ti.

Arunachal Pradesh BJP Unit chuan Inrinni vek khan thuchhuah siamin, Chief Minister Pema Khandu chu a nihna aṭanga paihthlak tumna awm anga Media lama tarlan chu thudik lo a nih thu an sawi. Thuchhuah chuan, Khandu lakah rinna an nghah thu leh BJP MLA 47 bakah Independent MLA 2 te chuan Khandu an thlawp thu an tarlang a ni. State BJP President Tapir Gao chuanKhandu laka rinnna an nghah thu leh a kaihhruaina hnuiah BJP sorkar ṭha tak a ding dawn niin a sawi bawk.

Arunachal Pradesh-ah assembly seat 60 awmin, rorel lai BJP chuan MLA 48 an neih bakah Independent MLA 2 te chuan an thlawp a ni. AP-ah hian kum 2016 chhung khan chief minister pathum an awm hman a, Congress sorkar laia chief minister Nabam Tuki chu a laka hel MLA-te'n party an chhuahsan hnuah chief minister a nihna aṭangin paihthlak a ni a, MLA hel hruaitu Khalikho Pul chu chief miniter tan lakluh a ni. Congress sorkar paihthlak a nih danah hian thil dik tawk lo a awm avangin Supreme Court chuan Congress sorkar din leh turin thu pek a tichhhuak a, Tuki-a'n lalthuthleng kalsanin Pema Khandu chu Congress sorkar tharah chief minister atan lakluh zui a ni.

Thla tam pawh a liam hmain Khandu leh MLA eng emaw zat chuan Central-a Congress party nen an inzawmna chhuchatin, regional party People's Party of Arunachal (PPA) chu an zawm zui a ni. PPA hi BJP din Northeast Democratic Alliance (NDA) thlawptu an ni a, Araunchal-ah hian NDA sorkar a ding zui leh. Nimahsela, kum 2016 kum tawp lamah khan PPA party chhungah nihna inchuh vangin buaina a chhuak a, Pema Khandu chu chief minister a nihna aṭanga paihthlak tum a ni. Buaina a awm hnu hian Khandu leh MLA 33-te chuan PPA chhuahsanin BJP an zawm leh a, hmarchhaka a pahnihnan Araunchal Pardesh-ah hian BJP sorkar a ding ve leh ta a ni.

Media-te'n an tarlan dan chuan, BJP sorkar-ah hian chief minister nih inchuhna boruak a awm chho leh mek a, Union Minister of State for Home Kiren Rijiju chu chief misiter ni thei mai tura sawi rik zingah a tel. Kiren Rijiju bakah hian State BJP President Tapir Gao chu chief mister atan hming sawi rik zingah a langsar hle bawk.

Hetih lai hian National President Amit Shah leh North East in-charge Ram Madhav-te chuan Khandu laka rinna an nghah thu an sawi a, chief minister thka tumna a awm lo niin an sawi. Media lama thu leng vel chu thubelhchian dawl lo leh, mipui rilru sukthlek tihbuai tumna mai a ni, an tibawk.