UPSC Chairman lailawk atan hmarchhak mi ruat

Union Public Service Commission (UPSC) chairman lailawk atan Union Cabinet chuan David R Syiemlieh a ruat.

Kum 63-a upa Syiemlieh hi hmarchhak state, Meghalaya khua leh tui a ni. Megahlaya aṭang hian Rose Bathew Kharbuli chu hmeichhe chairperson hmasa ber atan kum 1980 khan ruat a lo ni tawh bawk. Syiemlieh hian Alka Sirohi ai a awh dawn a, Prime Minister Narendra Modi-a kaihruai Union Cabinet chuan kar kalta Nilaini khan thutlukna hi a siam a ni. Syiemlieh hi June 2012 aṭang khan UPSC-ah hian member a ni.

Syiemlieh hian North Eastern Hill University, Shillong aṭangin MA history a zo a, university hrang hrangah thawk tawhin a, Arunachal Pradesh-a Rajiv Gandhi University-ah vice-chencellor te pawh a lo ni tawh. David R Syiemlieh hian lehkhabu eng emaw zat a ziak tawh a, chung zingah chuan hmarchhak history ziahna eng emaw zat a tel a ni.