PM Modi-a'n Assam-a cancer hospital 7 a hawng

Prime minister Narendra Modi chuan nimin khan Assam a tlawh a, virtual hmangin state chhunga cancer hospital pasarih a hawng a, cancer hospital dang pasarih sakna tur lungphum a phum. Hei bakah hian project dang eng emaw zat a hawng bawk.

Dibrugarh-a Prime Minister hun hmanah hian Tata Trusts chairman Ratan Tata, union minister - Sarbanada Sonowal leh Rameshwar Teli, Assam governor Jagdish Mukhi, Assam chief minister Himanta Biswa Sarma leh official dang eng emaw zatin an ṭawiawm.

PM-in cancer hospital a hawnte hi - Dibrugarh, Barpeta, Tezpur, Jorhat, Lakhimpur, Kokrajhar leh Darrang amite a ni. Hospital dang pasarih hi Dhubri, Goalpara, Golaghat, Sivasagar, Nalbari, Nagaon leh Tinsukia-ah din an ni dawn bawk.

Modi hian Veterinatary College (Diphur), Degree College (West Karbi Anglong) leh Agricultural College (Kolonga, West Karbi Anglong) dinna tur lungphum a phum bawk. Heng project-te hi Rs vbc 500 chuang hu an ni. Hei bakah hian Amrit Sarovar project 2,950 chuang tan lungphum phumin, Amrit Sarovar-te hi state sorkar chuan Rs vbc 1,150 sengin a siam dawn a ni.

Diphu-ah 'Peace, Unity and Development Rally’ neiin, PM Modi chuan sorkar laipuiin Assam-a law and order dinhmun ṭha chho zel avanga district 23 aṭanga Armed Forces (Special Powers) Act a hlih chungchang a sawichhuak a, boruak a ṭhat chhoh zel chuan hmarchhak biala he dan la hman meknaahte pawh hlih chhoh zel an ni ang, a ti. BJP double engine sorkar, centre leh Assam-a BJP sorkarna ding ve ve chuan Assam-ah boruak muanawm leh hmasawnna chak zawk a thlen a ni, a ti.

Tun hnaia Assam leh a ṭhenawm, Meghalaya state-ten ramri chungchanga an buaina neih ṭhenkhat chingfel a, inremna an siam chungchang pawh sawichhuakin, PM chuan he inremna siam hian state dangte pawh ramri buaina an neihte chingfel tura chona a siamsak a ni tiin a sawi.